與法國人對話

Posted on 20/09/2010 由 bananasims

今日放學做完手尾，因為落雨關係去咗奧運站。

去到有幾個外國人好徬徨咁係咁問人，最後問我。

Excurse mer, parlez-vous français?
Excuse me, do you speak french?

Un peu.
A bit.

Nous voulons aller xxxxxxxxx station Curseway Baie?
We want to go to Causeway Bay. (Bay 法文乃 Baie）

Aller cette l’escalier, station Hong Kong, correspondance pour ligne de l’Île (Island Line) liés Admiralty, c’est la station Causeway Bay.
Take this escalator to Hong Kong Station, interchange for Island Line bound for Admiralty. This is Causeway Bay Station.

Merci beaucoup.
Thankyou very much.

從上述對話可以有以下既 implications：

我咁既 Oral French 可以在會考中奪得法文 A 級成績，所以有機會（都無機會了）搏下無妨。
法國人去到外國都係奉旨人地識講法文。
法國人地到外國問人都係鐘意講法文講得超快。

幻想港鐵路綫圖

Posted on 28/05/2010 由 bananasims

回覆

My MTR Dream

我既新幻想目標係香港各大區域都有鐵路連接，唔洗去到九龍區又返新界。我已經 assume 咗有唔少人往來新界各衛星城市工作。

其中有三小目標，新界區有鐵路幹綫到達港島（南北綫、東涌綫同埋屯門綫）、連繫新界區既鐵路盲點（東西綫連接沙田、荃灣同屯門），亦都優化一啲路綫（例如：馬鞍山去九龍東唔洗再繞經大圍，石門轉車），令到更多人唔洗轉車、捱少幾個站去到目的地。輕鐵亦都有黃金海岸、置樂支綫。

未來發展有：
「后海灣鐵路幹綫」將東西綫連接深圳前海
「沙田綫」作東鐵二綫，延伸到大埔中心、聯和墟，再去文錦渡／蓮塘。南面亦都可以延伸到上環（幻想幻想）。
「新界北綫」經上水後喺聯和墟設站，再連接蓮塘／沙頭角。

不過都有留返啲生存空間比巴士既，好似上水去觀塘、大埔中心去觀塘、青衣去馬鞍山、荃灣市中心去沙田市中心、點都係巴士吸引。

以上純屬幻想，幻想係基於回歸時既鐵路網絡，無西鐵、無馬鐵，全部地鐵營運（食埋東鐵）。因為只係幻想，只係玩 SimCity，不喜勿插。我只係想再幻想其他野，唔好再留喺個腦到，所以畫出黎。

考試

Posted on 25/05/2010 由 bananasims

回覆

今日做既野真係唔少，今日作咗四篇文，中六既書都已經教到七七八八，可以做 PP。

尋日就本來作緊篇新聞評論，點知我尋日食 Pie & Tart 搞到成張紙變咗一張 turmoil，所以要大清早要返黎再做寫。份新聞評論係講五區公投，分析點解公投潰敗，令香港民主步伐倒退；仲有公社黨點樣自欺欺人、有違民主精神等等。總共作咗千六字，今朝七點三返去就係要嘔返七百幾字出黎（張野變咗一 pat 薯蓉）…

然之後今朝 double 中化堂，又要作實用文…篇實用文係 PP，零四年的，就講有間「杏林心臟病醫療中心」開幕，要寫演講辭／新聞稿／會議記錄。我揀咗演講辭黎作，因為會議記錄好多格式，新聞稿好難寫啱語境。寫咗千幾字，隻手好累。其實我好想知中化實用文作文係類似綜合運用，定真係作文，因為資料好多，都唔知可唔可以用自己既 idea…

第三堂世史教自由主義同民族主義。之前已經教咗法國第二共和同第二帝國，教埋第三共和就已經完 Form 6 Syllybus。不過呢，我成堂我自己喺度做英文作文（我有聽書架）。我作既係 UE 既一篇 Two-Sided Argumentative Essay（交比補習老師），講金融海嘯既好壞處。起初好膚淺咁樣覺得金融海嘯係全部壞，不過有次做 UE Comp 練習，見到 98 年既一篇 SCMP 報紙，講日本比美國啲陰謀搞到 90 年代大蕭條既後果同 implication。個作者既分析完全唔同其他人由上而下咁分析，係用一個全新角度去睇件事，指出日本社會結構有正面既大轉型，金融危機唔係完全衰得晒，甚至可以係好既。成篇文唔少都係用佢既 point，作咗六百幾字到（UE 多字除咗比機會人地扣分之外係無好處）。

第四堂 ECON 還原基本步教第一課，解釋點解經濟學係一門實證科學，理論等等。呢啲早就喺九月補習，同埋睇張生本科學與需求睇晒，所以有啲悶，因為成堂又係喺度講「太陽喺東邊升起」…「一跳樓就跌落地下」等等解釋何謂套套邏輯、理論，同埋可被推翻但未被推翻等等既野。而家我可以話讀完成個微觀經濟學課程，確實係好有趣既一門科學，好多行為都可以解釋，好似係點解會有自助餐而唔斷件計、茶餐廳會比人製造滋擾等等，比 CE ECON 有趣得多。

第五六堂空堂…作 UE Practical Skills，就係 04 年的。個 Practical Skills 講一個香港商人同探險家，用眾多既資料去分析佢應唔應該參賽…篇野真係好鬼無聊，作咗一個鐘頭四十五分鐘收檔，作咗五百幾字…呢篇合格都偷笑，因為亂做，做到 Conclusion 先明個問題想問乜

走，返到屋企，用咗一個鐘煮肉醬意粉，就做數。M&S 四月已經教完 Integration，教咗一個月 Statistics。Statistics 嗰啲 dispersion（例如：Combined Variance）至今都唔係好熟，不過練習又唔多…今回死梗…今日就主力做 PP，基本機會率，呢啲上年考 IGCSE / GCSE 讀過，所以都唔算太難…希望考試都可以保到條 A…

今日仲有大吧時間，要睇張五常啲偉論…

Probability x Permutations & Combinations

另外，因為近排落咗大雨，啲污染物洗晒落地下，所以好多藍天白雲，我尋日同今日都影咗少少雜相。（全部都無執過）

: Probability x Permutations & Combinations

機場徑

Posted on 17/04/2010 由 bananasims

回覆

4 月 13 日，本來想燒烤的，不過個個人喺度趕功課，所以自己出街算。

因為嗰啲戀愛星願仲有一張東涌、迪迪尼同埋大埔墟未用，所以用埋佢，決定去東涌。行程係咁既：東涌—逸東—東涌—迪士尼—大埔墟—九龍塘。

首先搭去東涌，食咗大家樂，再喺東薈城行個圈。本來行程係去逸東，不過嗰陣行下行下行到去昂坪纜車站，改行程行去東涌海濱算。東涌海濱係一個幾靚既地方，望住赤鱲角。呢個地方好少人，我上次夜晚黎呢度仲見過有人對住機場打野…呢度黎過兩次，今次第三次。

喺東涌海濱逗留咗一陣，就向赤鱲角南橋進發，因為想望清楚個昂坪 360 纜塔。沿路都有少少人踩單車跑步。行咗一大輪上返東涌海濱路先上到橋。上到南橋，好大風，完全企唔穩，因為水平高過個海濱，景觀尚算不俗。沿住條橋向赤鱲角方向行，行咗大約十分鐘（因為邊行邊影），行到去昂坪 360 纜車轉向站。

嗰陣時坐 S1 都已經成日見到有條緩跑徑同埋觀景山，今次就索性上埋去，抓著欄杆，爬咗大約廿幾級，昂坪 360 就喺頭頂，駛入去纜車轉向站。當然，乘客睇得好清楚，佢都睇我睇得好清楚。呢個位比南橋更大風，又係要抓著欄杆先企得穩。

繼續向上爬，爬咗八十幾級就到山腰。山腰只見一條泥路（leave alone 有欄杆），不過風又無咁大，應該吹唔正。呢個位真係靚啦，成個東涌，由映灣園去到逸東，去到昂坪 360（彌勒山）都非常清楚。影咗幾張 panorama，就繼續向前行。

沿路風景好靚，機場景好多灌木阻，不過東涌景就好靚。風都幾大，條路都風化得好嚴重，有段泥路中間有條乾沽既“河”，行路要好小心，不過亦都有舖得唔錯既梯級，昆蟲就唔多，只係間唔中見到啲大隻既蚊（無阿拉斯加安格雷治 Anchorage 機場入面嗰啲咁大隻，嗰啲成隻錶面咁大 =.=）。

行咗廿分鐘（其實好多時間晒咗去望風景同影相），就到咗觀景山山頂。山頂有個三角檢測站（Trigonometric Station，有讀地理既應該好熟，係一座山既最高點），三角站再前少少就有一個涼亭，入面仲係有個「歡迎光臨香港新機場」既牌，應該係 1997 年前叫訪客黎的。嗰個涼亭只可以勉強見到燃油庫同國泰城，因為有好多灌木遮晒啲景。而呢個「山頂」既景觀老實講我覺得唔比頭先啱啱行樓梯嗰度為好，所以逗留咗幾分鐘已經走。

回程係難行過上山既，因為條路風化得好嚴重，落山要好留心啲沙石。行咗十幾分鐘落返去赤獵角南路。

落到去就沿住個機場徑行，沿途無乜嘢特別嘅嘢睇，行到去個古窯公園及機場古物園。落咗去唔知有乜特別所以走。（其實根本就無留意，因為好口渴，啲水飲水想快步走）。無沿機場徑行，亂行，最後行埋車路去國泰城坐 S64 去機場食野。

喺機場 T2 dull 咗個圈，然之後坐 S1 返東涌。因為時間太晏，所以就坐地鐵返屋企，無去迪迪尼同大埔墟，張優惠卷都無用到。喺東涌嗰陣就天晴，去到陰澳就天陰，去到青衣就大霧，啲天氣真係好局部性。