得閒打返啲遊記文先。

成世人未去過荔景、葵涌同大窩口咁滯，最多都係去過新都會同葵涌廣場。咁小弟又有時間，就一於上去葵涌行個圈啦。

今次想去既係石籬、梨木樹同石圍角。去到青山公路夾石排街就上啦，再搭 lift 上去。石籬一邨無想像中咁舊，但係成條邨得一個報紙檔，餐廳雜貨店乜都無 然之後上咗怡峰苑…自成一角唔錯，幾靜，而且應該個景唔錯。

然之後落梨貝街去到石籬商場（其實都行幾耐）。個商場好少有係好多小店，得美心 MX、萬寧、惠康同埋美心西餅幾間連鎖。美心 MX 平過出面的，但係我係响一間麵包店（小店黎講都偏貴）個黑椒雞扒包同埋响佳寶買 $2.5 七喜醫肚。個包唔係話好好食，可能凍咗啦。

然後沿大隴街落和宜合道，再轉咗入去石蔭路。和宜合道真係好密，密不透風，又無樹，空氣好差。呢度應該叫係北葵涌既市中心掛，好多舖頭，乜都有。去到傳說中既北葵涌市政大樓，起到成個變電站咁，幼而長，仲有個巴士總站泊响度…其實我好鐘意呢種廣場，好似加連威老廣場或者大埔嗰四個，四通八達好方便。

然之後上心中既大斜路和宜合道。無想像中咁斜，至少達之路咁都斜過佢。亦都無想像中咁長，行幾步就到咗梨木樹邨。梨木樹邨梨樹路夾昂磡路嗰度個 feel 好似秀茂坪市中心，當然車少好多。然之後就行樓梯上咗和宜合道。

過咗象山交匯處就到象山邨。我睇返 Google Street View 以前個巴士總站呢家攞咗黎起高鐵，初頭我仲以為唔行得城門道。係有路去城門道，但係我都無行，因為入咗城門谷公園，因為影荷花而久仰大名。呢個公園好多樓梯，行呀行，就會抵消返因為和宜合道而上升既海拔…呢個公園有個荷花池，但非荷花季節唔好要求有荷花。越行就越覺得個公園好似三藩市個金門公園，人工湖、河同瀑布，不斷咁落樓梯就到另一個湖…行下行下都到城門谷游泳池。呢個泳池設計有啲敗筆，渣車泊車一定要經象山邨慢慢落，唔可以由德士古道北…好彩呢度唔係札山道要由黃大仙沙田拗道上山兜晒成座山先到彩雲邨。

落呀落，就去到荃灣地鐵站。再過少少就到愉景新成，我為咗用美心 MX coupon 特登行過去，點知行咗差唔多成十分鐘……最後美心 MX 太多人都係食咗老麥。