今個禮拜一又見咁好天，事不疑遲，立即出發去南區。

上次就華富、瀑布灣、華貴、田灣海傍道、田灣、香港仔、鴨脷洲大街、西邨、海怡，今次就「精選」咗啲地方，域多利道、數碼港、瀑布灣、華貴、香港仔、鴨脷洲大街、海怡、鴨脷洲大橋同赤柱。

首先去到中環交易廣場，等 M47 巴士。預好時間，幾疏。城巴啲班次好過九巴嗰啲，全部 20 分鐘、15 分鐘一班，易預時間，唔同九巴嗰啲 8-12 分鐘，真係難睇到…坐 M47 沿途可以欣賞港島西面域多利道嘅美景，可以睇下。如果嫌慢可以改坐 30X 去數碼港。

去到沙灣徑落車開始行，會見到港大宿舍，幾靚的。再行落啲去到數碼港道交界就見到香港西面既海景喇。

沙灣徑。

上面右邊係港大嘅運動場，一定要入到港大 (bomb)。沿住數碼港道落都見到好靚嘅景觀，呢度睇日落都唔錯，不過我會鐘意去其他地方多

數碼港道。

再行落去就去到象徵商人搵政府笨嘅數碼港喇。呢個景咁靚就係比李氏家族起個無咩大作用嘅數碼港（查實係寫字樓）同埋貝沙灣。唯一剩返我地有得用嘅都係佢海濱公園嘅靚景。

數碼港。

過咗個海濱公園上去數碼港道。數碼港道呈半月形屈上去域多利道，全程都望到唔錯嘅海景，夕陽都唔錯。

未被破壞嘅傳統海岸線。

數碼港道海景。

睇地圖都知，如果由數碼港行去華富，一定要兜上域多利道，不過查實有條捷徑，可以爬過去，過咗條瀑布上面嘅小鐵橋就去到華富嘅瀑布灣公園。量力而為，呢條鐵橋好兇險，而且曾經死過人，我不負任何責任。

數碼港道捷徑。

小鐵橋。

沿住數碼港道行上去域多利道，你會見到上面都有兩個小瀑布，就係瀑布灣條瀑布嘅源頭。

域多利道瀑布。

域多利道瀑布。

沿域多利道，經華翠街進入華富邨。沿住華景街去到聖公會呂明才紀念小學，行樓梯落瀑布灣道，再沿瀑布灣道落就會見到瀑布灣公園。再沿樓梯落就會見到圍欄。政府封咗，因為以前曾經死過人，你可以照爬，個個人都照爬，欄杆都甩晒色，不過保險唔賠。

瀑布。

瀑布灣。

瀑布灣。

瀑布灣。

瀑布。

有人試圖清石頭，改善水流。

仲有細路女响度玩添。

再行到去華貴邨，坐綠小 51S 去到香港仔。香港仔入面無乜嘢行嘅，不過有時間去香港仔舊大街食下謝記魚蛋，幾好食。响香港仔過隧道之後，你會去到香港仔海傍。香港仲係漁村嗰陣邊有維多利亞港，只有香港仔漁港。

香港仔海傍。

响呢度可以坐漁民開嘅香港仔水下遊。唔知咩價錢，無諗過。你亦都可以好似坐天星小輪咁，搭鴨脷洲大街—香港仔嘅街渡，盛惠 $1.8，小童 $1，幾平，仲有特色過天星小輪，睇住位水上人渣船幾熟手。

香港仔—鴨脷洲街渡。

過到去鴨脷洲，當然唔少得影海景啦。

鴨脷洲海濱。

搭水渡嗰陣時聽到啲居民話，「好彩仲會撞到利東 Wonder Girls」（利東除咗服務利東邨仲有鴨脷洲大街）。除此之外，佢地話下個禮拜四 17/3 鴨脷洲大街文武廟亦都有活動，可以睇下。

香港以前漁民就係咁生活。

去到鴨脷洲大街海傍，不仿入入大街。鴨脷洲大街係香港其中一條最早嘅街道，以前香港除咗香港仔之外，只有鴨脷洲大街架啦。入面仲有條以宗主國首都倫敦命名嘅倫敦里，係以前叫倫敦碼頭嘅碼頭，只不過拆咗。

沿住海濱向西行，會去到新起嘅風之塔公園。個風之塔我唔係好識欣賞，不過上到去都見到香港仔嘅無敵美景。

風之塔上面嘅雀仔。

香港仔景觀。

鴨脷洲除咗大街之外，海怡半島都有海景睇，不過比較 dull。如果時間充裕同唔太累都不妨去下。

海怡半島。

海怡半島經海怡路，大街經利枝道／消防局樓梯，可以去到鴨脷洲橋道。下一個站係鴨脷洲橋道。向香港仔方向嘅行人路可以飽覽香港仔嘅景色，日落仲有下低嘅舢舨做襯托。而另一邊鴨脷洲方向，亦都可以睇到南灣同埋海洋公園嘅景色，不過日落就無咁靚，始終係大街多車阻。

鴨脷洲大橋。

鴨脷洲大橋。

鴨脷洲大橋。

鴨脷洲大橋。

去到香港仔落橋，過馬路去到香港仔海傍道嘅巴士站等 973（仲有好多架）去赤柱。

赤柱天后廟。

唔少得赤柱天后廟啦。不過而家赤柱廣場領匯翻新緊，影中軸有好大嘅嘢阻住，所以直接咁樣影算數。

美利樓。

美利樓嘅亭台樓閣。

好多人响度玩人像攝影。

赤柱海傍。

赤柱大街。

呢度啲嘢都幾貴下，一來係港島，二來係旅遊區，不過選擇算多。

最後去咗赤柱灘道坐綠小 16X 去到柴灣站。個南區遊就此完結。