尋日派晒卷，所以今日基本上都係 hea 過。ECON 已經開始教書，HIST 就因為唔夠時間唔教。

因為今日係 Day 1，所以有 Chapel。Chapel 既主題唔係有人傳教，係學生會選舉制度改革。話說下年開始中五同埋中六都係會競選學生會主席，所以要增加學生委員。另外，因為高 form（尤其係中六同中七）覺得要將現行制度改為內閣制（多人負責制）。

由於我作為高 form 學生，晨早知道已經討論緊內閣制同埋現行制度既利弊。內閣制即係英國行緊既制度，一班人（黨）有一個黨魁，選民投票選個黨，再由個黨魁做領袖。內閣制下，選民可以因應財政部長、外交部長等等而決定最佳人選，且對黨魁亦都有較少壓力，因為內閣制係集體負責；現行制就類似而家美國，投票選個人，再由個人去選擇部長等人選，選民無得因應邊個係部長而決定合適人選。另外，現行制下，只要班子做錯任何一樣野，都係由個頭認錯，對佢壓力頗大。講咗咁多，大家都應該知我既立場係乜。

呢個制度講咗成半年，不過斷估唔到學生會高層諗住快刀斬亂麻，今日立即 present 內閣制，再即日投票…即使我知好耐，亦都認同內閣制，不過低 form 嗰班講幾下邊會明，模模糊糊下投票都唔會對自己一定有利。

咁呢個推行活動當然有答問環節，嗰班中四學生先激到我地冒名火起。嗰位中四學生見識少、片面地將部份事實當作事實的全部，發表偉論出黎獻醜。佢竟然話「舉行內閣制，豈不是舉行小圈子選舉，將功能組別推行。咁樣係民主制度既大倒退！請立即收回內閣制！」。樓上中四同學竟然拍手掌同歡呼，點知原來自己係反對緊一個民主制度。我前面既女同學，可謂極端社民連支持者，一向都同佢政治方面好多「瓜葛」（當然唔係阻口阻面既程度），一聽到就話「有無搞錯呀！」。當然啦，內閣制度喺多個公認民主既國家－日本、澳洲、英國等國推行，由美國既制度轉去英國就叫民主倒退，唔知乜野理論喇。呢位學生見識少，片面以為內閣制＝功能組別，難怪我前面位女同學同埋老師都發言炮轟佢喇。而家呢班憤怒的年青人（簡而言之：憤青）已經受到好多既組織，以社民連尤甚，既疏擺。不過，絶大部份都無獨立思考，認為「非黑即白」、「非我即敵」等等表面民主、實質專制既思維更加係恆河沙數。好難怪呢班中四學生逢親聽到關於小組式既選舉都神經敏感、反對。

答問環節過咗之後，就係「校內福利報告」。今年又講廁所沖水問題同廁紙問題，我校長最鐘意嗰範。由中一入學到而家升中七，都係未搞掂沖水問題同埋廁紙問題，真係服咗佢地班友…不過呢間學校都留多六個月到都唔會用喇，我都唔會好關心…

過咗後，就開始只有半個鐘既堂（平時 55 分鐘一堂）。

數統，無上堂，大家一齊吹水。

世史，傾 essay（論述題）。

ECON，教書。今日開始教 Macroeconomics，中七課程。今日教凱因斯模型同埋 GDP。似乎係講政府點樣刺激經濟活動既多，因為凱因斯都出晒名佢套凱因斯主義，「一位學生上凱因斯的堂睡著了，凱因斯很憤怒，問他剛才問題既答案係咩。學生答，雖然他不知道問題是甚麼，可是答案一定是增加政府開支！」。呢套主義已經搞到而家歐豬五國一鑊泡。不過點都好，畢竟係 A-Level 課程，而且我又未上晒堂，咁早評論都唔太適當。除咗凱因斯嗰套外，仲有講 C + I + G + X – M (GDP)，同埋 y = mx + c (Linear Equation) 呢啲式。時間好快完…

UE 今日講 Practical Skills。Practical Skills 永遠都寫唔夠 point 的…

課本。