其實我都好耐無打遊記啦，因為我去嗰啲地方黎黎去去都係嗰幾個地方，去過晒，無乜好去。不過，今次去既地方係馬灣－成世都未踏足過，所以寫下啦。

我同某人去的，首先喺荃灣西站對開個碼頭上船。啲船 30 分鐘一班，船期都幾怪下。通常天星小輪、北角渡輪碼頭都係 00、30 咁開，佢就 17、47 咁開船。等咗一陣就上船。隻船都幾貴下，都 $8，大約 15 分鐘去到柏麗灣渡輪碼頭。

一出到黎碼頭，又係啲似曾相識既裝修。慢慢行出黎，就見到一排柏麗灣既樓，並且有一個見到青馬大橋既海濱長廊同埋一個廣場。有一陣陣海風吹黎，個環境幾舒服。行咗一陣就行到去東灣海灘。初頭某人唔想行入沙，因為會入沙，不過最後都係入咗去近挪亞方舟嗰堆石搵位影相（我嗰啲影得好差）。

影完離開個海灘，行返上去。上到去條路上面係一條連接青馬大橋既行車橋。沿住條路慢慢落，右手面既公園就係馬灣公園。馬灣公園同政府設計既公園已經好大分別，保養好好多啦，同埋有個好大既廣場，有啲迪迪尼 feel。個廣場中間有個貝殼，係咁噴煙。當然，個公園唔會得咁大，真正既好戲係馬灣公園入面個綠色園林。

喺個廣場入口有一排出入閘機，一過咗就係綠色園林。入咗去之後，全部都係用木板砌成既小徑。你要沿住啲婉娗曲折既路徑慢慢行上去，跟住啲指示牌行去你既目的地。呢啲木板小徑有時路中心會有啲樹，掛住個告示話「保留原有樹木」。我心諗，格離啲樹咁密，你開咗條路出黎都唔知斬咗幾多樹啦。慢慢行樓梯上去，不斷有啲告示話可能有蛇或者蟋翼，希望唔好好似聖淘沙咁啦。慢慢上，有幾條溪流，最後去到一個金韻廣場。個金韻廣場係一個廣場，側邊有啲野餐椅，而向汲水門大橋嗰邊就有啲一條條既風琴鍵，幾靚的。不過，我一眼望落中間嗰兩條線，令我諗起模擬樂園 3 啲單軌鐵路…

喺金韻廣場影咗幾張相，拍埋全景相，就用第二條路離開。慢慢落，隻腳比勁多蚊圍攻，頂唔順。慢慢落，側邊啲欄杆有好多昆蟲：蟻、甲蟲，同埋我至憎既蜘蛛。嗰條路實在太多昆蟲，又唔係多花，所以我都好想急急腳走人，不過某人就喺度 pan 螞蟻（同佢鬥快），有隻仲停喺度比佢影 =.=||。

拿拿臨走啦，點知出到黎既地方唔係喺公園範圍，係出咗黎一條街到（查地圖，係叫珀麗路）。第一次見啲公園設計可以咁弱智。沿住條馬路行返去個公園，去埋未去過既地方。由於弱智環保團體唔比車入柏麗灣，所以成條路都無車（得行車天橋下面條路有巴士）。除咗筆架山之外無乜地方可以行路中心，所以我索性行路中心，又可以順便影下啲路既材質（比 BVE 輕鐵用，例如分隔器），好正。

返到去馬灣公園個廣場入口，返返去啲未去過既地方，例如「再生風力發電場」、「彩虹瀑布」同埋「紅樹林」。個「再生風力發電場」只係一間房，相比政府嗰啲博物館質素真係差好遠（例如濕地公園），成個 Windows 既 UI 都出咗黎，入面啲字又細隻，真係搵鬼去睇。而個「彩虹瀑布」又係無乜特別，因為佢啲水好出奇對污糟，下低個 plunge pool（唔知中文係乜）起晒泡泡。不過，瀑布附近好多蝴蝶飛黎飛去，真係好靚。而個「紅樹林」…沿住條小徑行，見到條小徑係掘頭路（cul-de-sac），先驚覺入咗「紅樹林」呢個地方。得兩隻假既獅子，一隻好真，另一隻就好假。

離開公園，去個挪亞方舟睇下啦。因為個廣場除咗入閘機之外，仲有條路側邊有好多藝術品，所以諗住行嗰條路去挪亞方舟。行到去尾嗰陣，有個廣場，見到個挪亞方舟既入口喺對面，不過…中間隔住啲欄杆，一對門都無，過唔到去對面。呢啲設計真係弱智，淨係方便自己管理。最後又要行返去入閘機嗰邊再過去挪亞方舟。去到個門口，先知原來挪亞方舟要收錢，最低消費收成 $55（全日制學生唔只呢個價）。我本身係無神論者（不如話我反基），所以唔會比咁多錢去睇啲假歷史，所以離開算。

又係沿返海濱長廊行返去柏麗灣碼頭嗰邊，入咗去啲超級市場睇下，又上咗去平台睇下。因為唔多想搭船，最後揀咗搭去青衣既巴士。架巴士 $9，上咗巴士之後都停好多站，好多人仲要企…比我就唔會住喺柏麗灣啦。最後大約 10 分鐘返到青衣站，去第二到睇。

本來去馬灣係想睇下個挪亞方舟係點樣，點知收咁貴就無去睇。不過馬灣公園都有個驚喜，有啲部份都幾好睇的。去完呢次之後，我都明白點解咁多人話柏麗灣唔好住。