馬鞍山綫遊 01 我就係去大圍同車公廟站、馬鞍山綫遊 02 我就係去沙田圍、第一城同埋石門站，今次講 03。第 3 次我就係去剩返未去既車站：烏溪沙、馬鞍山、恆安同埋大水坑。今次係 2008 年 12 月 27 日。

又係老方法，搭東鐵綫去大圍轉車，再直達烏溪沙，逐個站拎車站指南。今次我九龍塘－大圍同埋大圍－烏溪沙全程攞住部相機錄片，點知去到馬鞍山入站前唔夠 memory…搞到要兩段都刪再錄過另一段。

搭咗十五分鐘，去到烏溪沙。奉旨落客務中心拎車站指南，條友好鬼串，唔理佢，上返去搭去馬鞍山。馬鞍山當然又係拎車站指南，不過問完嗰條友狂望住我…為咗唔好比佢覺得我係為咗收集車站指南，索性出閘，比佢一個感覺好似真係遊覽馬鞍山，而唔係為咗拎車站指南。

出咗閘就係新港城。新港城無乜特別，求其去美心 MX 食個西多算。之後又要繼續行程，無理由又搭車去恆安，所以行過去。印象中馬鞍山綫全部都係起喺西沙路上面，所以沿西沙路行實無死。馬鞍山又係有類似沙田區嗰種規劃，又係有好多單車徑同埋隧道，都有唔少樹的。

行咗大約十五分鐘，去咗西沙路中間，見到港鐵標誌啦，大大個寫住「恆安站」。條路都起得幾靚的，上面有啲帆布，左右有扶手，有時中間有啲車路。呢啲既美觀又實用，點都好過西鐵呢個大白象。不過最衰係落雨…落雨無得拎扶手。

行到入去，又係貫徹九鐵文化，無得經車站前往其他非收費區，算鬼數。我嗰陣希望可以行埋去大水坑，不過印象中嗰段西沙路已經係快速公路，所以我去客務中心問個職員，佢立即 O 晒，話無得行…時有三急，我一向知道前九鐵有廁所，所以去廁所。嘩！廁所條通道格離係一個露天地方，落雨咪正！九鐵真係勁喎…

搭車去大水坑，拎車站指南。本來計劃係搭埋巴士去大學站離開，不過我唔熟路，所以算。大水坑無乜野特別，只係大堂有啲禁止進入咁解。

遊完啦，未返屋企住，去烏溪沙錄返段片先…搭去烏溪沙，再慢慢搭到去大圍，段片都成 GB 幾…然後返屋企。

成個馬鞍山綫遊記打晒啦，遲啲得閒打：荃元屯遊記、大埔遊記、上水遊記。

馬鞍山綫遊 01 我就係去大圍同車公廟站，而我係喺 2008 年 12 月 25 日做第二次馬鞍山綫遊，係去沙田圍、第一城同埋石門站。

首先，又係，搭東鐵綫經大圍去到沙田圍。搭住馬鞍山綫嗰陣一路都係影住個景，馬鞍山綫起得幾靚。之後去到沙田圍落車，奉旨攞街道圖。出咗黎一條大街，叫沙角街。沙角街就無單車徑，不過都好有沙田 feel，好舒服。睇街道圖，好似無大街係沿住馬鞍山綫行，所以就要亂行了。

沿沙角街行去花園城（又要過隧道），再穿入中間，見到間呂明才中學，再靠右行，出到去圓洲角路前有個花園，幾多飛仔的，急急腳行到去路邊。因為街道圖顯示極限，乜都睇唔到，所以要靠估，就係沿沙田圍橋底行。立即轉右，行到去一個地方，掘頭路黎，格離幾多大排檔，睇落幾惹味。唔好諗，繼續行…

行呀行，行到去個公園。本來諗住上去公園，因為我覺得個公園就係第一城站個位，點知…格離沙田路條隧道見到個港鐵標誌。呢盞明燈指示我去行嗰條行人路，所以沿住佢行十分鐘，過咗一個巴士總站，見到威爾斯親王醫院，行多一陣就到第一城站。當然我無咁快放棄搭車返屋企…所以我又攞張街道圖，行去石門站。

我唔放棄行，因為印象中第一城站同石門站係好近，並且記得係條直路。所以我繼續沿插桅杆街行。行呀行，條街完全無人，因為喺工業區，不過條路又勁闊。我而家先發現原來沙田第一城離第一城站咁遠…行呀行，過隧道。條隧道比我一種好不安既感覺，前後各有一人都好似係想打劫嗰啲人…所以急急腳過隧道去到傳說中既沙瀝渠同埋海濱公園。個公園同埋城門河嗰個有得比，幾靚，特別係望去小瀝源個 view。

行返上去插桅杆街條橋，正！見到石門站，右邊見到有啲起緊既公屋，遠望仲見到小瀝源萬家燈火，超靚。不過我嗰日無乜心機影相，求求其其影完就算。最後行到去石門搭車去大圍站。

去大圍站，今次唔係轉車，而係再買啲鍋貼。嗰啲鍋貼真係好鬼死好食，而我都買埋菜肉包。鍋貼菜肉包各六個，盛惠 $40，正！之後搭車返去九龍塘港鐵站，發現死人 29B 加價…返到去又係同屋企人 share 啲鍋貼菜肉包，今次早買好多，所以好食好多。

P.S. 真係好求其影。

其實呢個馬鞍山綫遊我係分咗三日去遊，因為次次都唔夠時間…我揀馬鞍山綫（唔淨止係馬鞍山），因為我好鐘意沙田區。沙田區啲路好闊，好似車公廟路都已經四條行車綫，路中心又有樹，行人路邊又有樹，而行人路又有單車徑，好舒服。今次我講既係第一次遊，第一次都成個禮拜，係上個星期六（12 月 20 日），我係遊大圍同車公廟。

首先，搭東鐵綫由九龍塘去到大圍，搭一個站都要五分鐘了。MLR 係呢一段先有啲怪聲，日日返學搭九龍塘至旺角東係無啲怪聲。大圍係其中一個我最鐘意既車站，九廣鐵路起既站罕有地咁光，不過又係樓底勁高，無頂（東鐵綫同馬鞍山綫），成日設計成咁…遊完大圍站，奉旨攞返張街道圖之後喺村南道個出口出閘。

村南道應該係大圍市中心，因為都幾繁忙，出黎見到車站好多蘋果日報既宣傳，幾得意（右相遠處有個蘋果）。過馬路，再沿住大圍道既左邊行，行到去到金禧花園個停車場，令我記五六年前喺度泊車。嗰陣我呀爸渣 Mazda 626，去到呢個停車場，轉彎都要倒一倒車，幾經辛苦先泊到。蘋果日報都選過係最難泊既停車場。再向前行，好肚餓，又見唔到有乜好餐廳，所以就走咗去 M 記食野…經典呢，特登去長洲食 M 記…間野喺積輝街同大圍道交界的。食完我就行返大圍道出黎，出發行去車公廟站。

行到去大圍道夾積福街交界見到有間小食店，正！我最鐘意食小食，行去睇下。無我最鐘意既格仔餅，不過就有雞蛋仔，$8。個雞蛋仔都好搶手，我都等咗成五分鐘先有得食，熱辣辣，好好食。間野都有整鍋貼同菜肉包，$10 3 個，我買咗 $20，分啲比屋企人食。

行去車公廟站。車公廟其實最近大圍站而唔係車公廟站，好似濕地公園最近天秀站而唔係濕地公園站咁樣…我行返去村南道，轉右見到有條行人天橋，過咗美田路，行上去先發覺原來大圍有兩個大堂，行過去睇睇。個大堂得條扶手電梯同埋客務中心咁大把，乜都無。其實呢度都唔洗起大堂呀，晒錢的。睇完之後落返去美田路行。

我細細個成日黎大圍，去聚龍居探朋友之後去大圍食飯，去大圍食飯就一定經過美田路。而我對大圍最深刻既印象就係美田路夾車公廟路上面個圓形行人天橋，不過我未行過。今次行上去啦，行上去，有分到係單車路定行人路，起得幾靚。轉個圈就落去車公廟路。車公廟路又係正宗沙田路，有單車徑、樹、闊既車路同埋最緊要：無車。我最鐘意喺呢啲新市鎮到。行呀行，經過唔知幾多條行人隧道（沙田幾多行人隧道，無乜過路處，可能要就埋單車），去到車公廟。車公廟無乜特別，留相一張就算。再行呀行就行到車公廟站，遠過大圍…車公廟都算起得好架啦，之不過又係有啲地方無頂同埋極高樓底…本來我係想行埋去沙田圍站，我問個職員啦，佢講得好清楚，不過我誤解咗，搞到唔知行咗去邊，算鬼數，喺返車公廟站搭車走人。

今次遊馬鞍山綫都幾好既，行下路鍛鍊自己都幾好，返到去成件衫都濕晒。而我啲鍋貼，凍晒