變魔術

買咗公寓生活五日啦，大約都摸得晒全部既功能，包括魔法。我諗住重建晒我起嗰啲公園同埋我啲舖頭，咁樣更加貼近真實，好似加返啲汽水機嗰啲嘢。

魔法呢個功能，以前都喺 The Sims Resources 篇文睇過，有分三種巫師，邪惡、中立同埋善良。呢個意念幾創新，唔比一個模擬市民可以同時變咁多個魔法。好似邪惡既模擬市民無得變最善良嗰啲魔法，vice versa。不過基本上，做中立既巫師都係無乜用，兩頭唔到岸。邪惡同埋善良既都可以用中立既咒語同埋整中立既物品，而中立又只可以用到五個邪惡同埋五個善良既魔法，中立真係無乜用。唔係我要收集資料我都唔會整。

公寓生活個魔法無乜難度，唔似模擬市民：魔法世界。以前模擬市民：魔法世界既原料多到嘔，唔似而家得六個原料…而且，每個咒語頂多都係要 3 個原料就變得魔法，原料又易整，無乜難度。好心佢就整返好似以前咁要坐蘑姑椅先攞到蘑菇做原料啦…

我記得有魔法世界有分咒語同魔法。咒語有個水晶喺度，變完就無，我記得有個落雨雲，嗰陣成日耕寵物世代既田種野賺錢，用呢個雲就正。仲有個好似 Mr.Humble 既人送個魔法盒，之後慢慢攞啲原料，好正。有個洞可以跳去魔法世界，又有面包爐整面包。去到魔法世界又可以玩競技，過山車，最正都係同啲小販玩 game。好似有啲雲無啦啦出現整暈晒啲人，變走晒啲雲，或者同啲小販鬥快掂晒啲蘑菇，正！

不過，始終佢唔係專係 for 魔法，差唔多啦。公寓生活喺公寓到玩始乎都唔太有吸引力，反而係公寓生活啲魔法、天花板、汽水機、遊樂設施比較吸引人。

呢幾日都打咗幾篇文，大家睇下（之前發現咗港論有人原文照 copy，不過又得閒到刪 link…今次整得好辛苦，希望無人偷）：

• 巫師
• 咒語
• 鍋爐

整埋魔擬貓就可以專心溫書！另外，Swiftzer Exam 開放使用，大家可以去申請用。呢篇野係用 Google Chrome 打。Google Chrome 啲中文字用簡體字既方式去 render，搞到啲字唔靚。倉頡打字好唔掂，成日打漏我前面個字碼，好似「、」「Ｚ難日金」就成日同我整到「難日金」，不過整體感覺唔錯。Blogger 身為 Google 一分子都有唔少問題。

模擬市民在跳繩

尋日玩咗一個鐘公寓生活，今日玩咗三四個鐘頭模擬市民 2：公寓生活。我今日喺公寓玩咗大約一個鐘頭，之後再去起返緊獨立屋睇下啲新既物件同埋功能。

睇下新社區先。公寓生活加咗個叫花鈴灣（Belladonna Cove），中文版一樣譯得咁差…今次我覺得個鎮都唔算係特別真。個花鈴灣整咗好多高樓大廈，不過唔襯週邊既地區（格離係郊區），假到爆。睇佢 Walkthrough 有講分三個地區，我覺得得得個低下同中等住宅區先真。低下住宅區，我記得有個中央大街公寓，嗰個整到好似 trailer park 咁，配合埋周圍環境真係唔錯。中等住宅區，有少少似三藩市東南面地區既感覺，幾好。高級住宅區最假，有少少碧桂園既感覺。啲住宅花園都無，而且有個廣場圍繞住你間屋。邊會有人鐘意你屋企附近係嘈既呢？

玩過幾間屋，啲新功能都唔錯，好似喺牆既衣櫃、牆邊既垃圾筒、牆邊既床、螺旋樓梯、兒童遊樂場、天花板、直升機、調節掛飾高度同埋可以好似哈利波特咁樣轉既書架（而家都唔知點玩）都幾正。天花板係我好期待既功能，如我所願，可以用地板裝飾天花版。直升機真係坐得，不過佢霸既範圍都幾大，都 1×1.5 既大小（社區用地）。直升機同埋牆既衣櫃可以嘿咻添（拍咗片，上 I-Circle 模擬市民網）。仲有一啲無為人留意既野仲有水管同埋抽氣管，同埋可以調節溫度既窗，不過無用武之地（我唔鐘意起啲 metal 質地既屋，調節溫度既窗有 metal 味道）。互動都多咗好多，好似多咗個 Give Me Five…模擬市民而家仲可以跳繩，幾正。

公寓一定要用 EA 整嗰幾間，唔係就用 ChangeLotZoning apartmentbase 呢個秘技。今日同尋日玩嗰間公寓唔記得叫咩名了，不過都幾真，有啲似 Town House。如果要玩公寓，首先要將家庭搬入去個公寓到，之後再搵地方租房。係租，唔係買。租到入去之後你就要去購物模式慢慢買傢俬裝修。你只可以換地板、牆紙同埋天花板等等唔變更結構既野…每個禮拜一交租比業主。不過住公寓，如果你有野壞咗，業主會同你整，幾正。

如果你將家庭搬咗去一個單位到，其他既單位會黑晒，你乜都睇唔到。只有你走去探訪鄰居你先會見到。NPC 鄰居 9:00-15:00 例牌返工，之後去到 22:00 就自己訓覺，其實真係唔覺得會有更親密既人際關係囉…成日搵親佢地唔係訓覺就返工…仲有，而家啲細路起身會自己刷牙…不過唔知係 bug 定係暴風雪停課，啲細路唔返學既…星期一至五都無返…Bug 我求其都搵到個，留意下「放置公寓」嗰個目錄，再咁右上角個「展開」，爛 UI～

今日起咗間獨立屋，又係用返我既舊 style 起…因為獨立屋，唔會用 Murphy Bed，不過就用咗個牆邊櫃，幾好。我都有起咗個水管扮下野，都幾真下。我 upload 咗去 Bubbleshare：

模擬市民 2 資料呢幾日得閒就會更新嫁啦，大家留意下啦。今日 upload 咗段衣櫃嘿咻片，欣賞下。仲有預告，Swiftzer Exam 聽日就會推出，大家支持下，右邊已經有個範例。

光碟

買咗模擬市民 2：公寓生活喇！真係好興奮，呢隻資料片都幾令我期待的。我係喺又一城間 MicroPlanet 買的，我 11 點就到，食咗個 M 記再走去買。11:20 食完，MicroPlanet 11:30 先開，我仲要等十分鐘。開舖啦，MicroPlanet 收銀機嗰部電腦又要等，實際都要 11:40 先買到。今次買 $178…其實我明知信和平我都唔去，因為我懶…唔想走去旺角咁遠…

返到屋企，拿拿臨裝好佢，未玩就先興奮～我已經喺 SimPE 到攞咗首公寓生活主題曲，又係同一首歌既 Remix，都有少少聽到悶，唔太差，不過我始終鐘意開店達人嗰首 Remix，嗰首真係好正。如果你想要，就上去 I-Circle 模擬市民網主題曲下載頁啦！

今次拆盒應該係最難忘，首先個包裝面層嗰個膠套，好鬼死難先扯得爛佢（以前啲資料片好鬼死易）。之後留意到張新既「一經拆封　恕不退換」既貼紙。呢個係有「購買前請先詳閱系統需求」隻字，而唔係好似以前咁樣成個系統需求列埋出黎。張貼紙呢就可以一分為二（以前係一張透明既強力膠紙），我就格硬扯開一半開個盒啦。

序號

開盒

開盒又係見到嗰啲嘢，Spore 宣傳單張，物品下載卡（有 Sims 3 標誌既模擬市民 T-Shirt）同埋說明書。我就理所當然放隻 DVD 入去裝，又到序號…開本說明書，又係銀油！？銀油由模擬市民 2：美麗夜未眠開始有，我仲記得美麗夜未眠拆盒搞到個 Serial 甩埋色，好彩仲勉強睇到，用原子筆畫上去。唔知嗰次係咪好多人投訴（嗰陣 EA Forum 成堆人投訴），之後既就有改善，而家就報復呢？個銀油用十蚊、五蚊、一蚊、五毫子同埋一毫子都刮唔甩…O 晒，後尾再用個女王頭兩蚊去刮，刮咗差唔多四分鐘先刮完（仲有啲銀油漬）。之後就攞個兩蚊銀去沖，點知又沖唔走…要我用手指甲續條「喇」刮，先刮走晒…個遊戲安裝序號句「購買時請注意序號括膜是否完整」極度弱智，嗰陣又唔比人開，購買時又點注意…

標誌

講返隻遊戲，個小標誌（icon）都唔錯呀，大標誌都 ok，不過唔諗住用 SimPE 攞嗰張，嗰張都係有少少問題既，問下 Kutar 搵下仲好…

註冊隻 game 嗰陣 EA 咪會寄電郵黎既，佢寫住

居住在公寓意味著有可能需要寬恕隔壁鄰居家的噪音。為了不至於經常在睡夢中醒來，不要把您模擬市民的床放在牆的另一邊是其他公寓的房間裡。如果這樣不可以的話，試著放些家具或裝飾物來避免同用一堵牆。至少可以降低您的市民聽到噪音而無法入睡的可能性。

唔知係咪真呢？或者而家，如果格離房有人開 Hi-Fi 嘈住晒，格離房既模擬市民會起身呢？希望係咁啦…頭先就咁望下本說明書，都幾多係講魔法同咒語，會唔會係模擬市民 2 版本既魔法世界呢？真係唔知。

而家真係好期待隻 game，執埋 I-Circle 模擬市民網既手尾就可以玩了！遲啲貼相先～I-Circle 模擬市民網會慢慢更新，大家留意下～