iPod Touch 4

Posted on 17/09/2010 由 bananasims

應朋友要求寫。

本來用開 iPod Touch 第三代，因為見有相機就買 iPod Touch 4。原來 15/9 到既，不過 16/9 先到，唔知個 TNT 搞咩事喇。

先講外型，開關機掣由左邊移咗去右邊，就好似 iPhone 3G 同 3GS 咁；部機同三代比薄咗；多咗個前後鏡頭，以及個 "Retina Display" 令 pixel 精密咗，靚好多。

軟件上用 iOS 4.1，其實同舊式無乜大分別。軟件無容置疑快咗好多，打倉頡唔再出現咁一個碼 lag 一下既景象；Skype load message 快咗好多，只不過老問題—時空交錯依然成日出現；另外，有响圖片加 GPS 資料的話都算有喜訊，包括我、我同學同上網搵過既例子在內，iPod Touch 2G 同 3G 係開唔到位置（Places）的，而家終於無事，仲好暢順。

最後就係講相機鏡頭，呢個係比較失望既一樣。一來 iPod Touch 4 無 HDR 功能，隨時有地方過曝而有地方唔夠曝；二來相片質素強差人意，好核突，影片質素反而比相機好。最好就有人整個 App 去將影片既一格存成圖，煩係煩咗啲，不過相片質素較好嘛。

總括而言，部機對我黎講都係值得買的。有 Retina Display、更加快，兼且最重要既係可以立即影相、立即放上 Facebook，不過你唔好期望有非常好既質素。

MobileMe 圖庫、日間影片、夜間影片

P.S. 上海篇野 WordPress 成篇野 cut 咗字，得閒先再打。

心理時間

Posted on 12/10/2009 由 bananasims

人既心理永遠都係唔夠準確，靠佢就死得。

我起身既時間成日變，因為我心理認為幾耐搭完就幾點起身，最後搞到 F6 開始已經遲到一次…以前 F1 ~ F5 都未遲過。

當然，返學越早返到越好，不過我呢啲 maximizing individual 梗係想訓耐少少，所以我都係要做返個統計，計下咩時間起身係最好。

我既統計方法係每日出街拎住部 iPod Touch 既計時功能，一到 "check point" (e.g. 旺角東站中銀）就咁一下計次，返到屋企再入電腦。

入完電腦，睇下啲資料就可以計到大約幾點出街最好。時間規劃更好，慳錢計劃實行都易啲（唔洗爭啲遲到搞到要搭的士）

最長既打仗日

Posted on 07/10/2009 由 bananasims

返學開始行旺角道行人天橋。以前一路行呢條橋都係由西至東，見到「旺角東站／東鐵綫」；今次由東至西，見到有個「旺角站／荃灣綫」，乜旺角站無觀塘綫？

HIST 測驗，廿條 MC，包括地理題（例如邊個國家喺聖斯提諾條約 Treaty of San Stefano 後獨立……凡爾賽條約建立咗咩國家…）。都算易既，我都係考天才，未溫過書（其實 History 係無書，要自己睇參考書）。然後講某屈機既 essay，"點解咁多國家嘗試做既和平行動都係失敗？"，好 informative，不過比老師話佢唔係回應條問題，得 20 / 30（其實 21 / 30 係好少人拎），我有佢一成都好。

今日 ECON 堂完咗就到 UE 堂，班空堂同學帶住成堆戰利品，神雕俠侶、射雕、吶喊…因為圖書館開倉派書，益晒啲空堂人，搞到我無得拎 :@ 不過，我就笠咗張五常本「卷一：科學說需求」同埋幾本英文書，係高考經濟必讀參考書。

順便入去借參考書，睇過下拎咗四本，希望呢五日睇到好多資料去寫條 essay。唔知寫巴爾幹火藥庫好定寫第一次世界大戰既成因好。

搭小巴去九龍城補習。今日唔坐架亡命小巴 70 號，坐佢架小巴根本搖黎搖去，位又窄，我坐 46 號再慢慢行過去仲好。坐 46 嗰陣見到有個通告，話旺角道近砵蘭街同洗衣街加站，本身旺角道個站取消。我就諗，喺砵蘭街停的話即係要 cut 返去中間直行嗰條線，同 265B 66X 37 嗰堆巴士線大交叉咪仲混亂。坐 46 號唔搖有個好處，就係可以拎部 iPod 溫書。叫咗下「眼科醫院有落」，落車。

搭搭下小巴收到 miss 既 SMS 話 5:30 先到，所以去咗法國醫院間 Starbucks 買咖啡飲兼做功課。Starbucks 啲咖啡貴過 Pacific，等又耐過人，只係個環境好。一飲，嘩咁難飲，得啲奶味…加咗啲蜜糖都係咁，算啦…喺度溫書做功課。

去到五點半去補習，無咩特別，只係教成堆 expotential function。因為做慣咗 bionomial 所以都慣晒，並且開始回復狀態… 其實 M&S 都唔係好難啫，考邏輯多…

最後就做咗一件非常柒既事，我搭 85B 返屋企，掛住玩 iPod games 同傾電話，搞到過咗站（入獅隧先知），最後顯徑 dull 咗個大圈，返九龍塘坐老豆車返屋企。

仲有份 ECON 未做，真係攞命 =.= 今日先係 Form 6 10 月 7 日，仲有成年半先 A-Level 呀…要捱埋呢段日字入三大！